Chief Minister hlui chuan, Remna ah hian India ram aiawhin Union Home Secretary, R.D. Pradhan-in a sign a, Zoram mipui zawng zawng aiawhin Chief Secretary, Lalkhama'n a sign a. Ramhnuai leh Ram chhunga MNF zawng zawngte aiawhin Laldenga'n a sign bawk. He remna ah hian tumah ral bang bik awm lovin, kan zavaiin kan tel a, a humhim pawh kan zavaia mawhphurhna a ni, a ti.

Remna nei tura kil tin atanga palai lokal kohhran mi, zirlai pawl leh mi chi hrang hrang thahnemngaiten 'in inrem theihna ang ang kan pawm ang' tiin, remna an duhzia an sawi thin. Inremna kalkawngah thil tam tak a thleng a, Bangladesh hial te pawh a piang a ni. Harsatna tam tak kan tawh kha tuna remna tura Pathian remruat alo ni zel a ni. He remna hi India emaw Mizo mipui duhthusam a ni lova, kan pawmtlan theih tura duan a niin, sign hnan a ni.

Central ah BJP hneh taka an han sawrkar lai khan Jammu & Kashmir chungchang ziahna chu India danpui atangin nuai reh an ni a, state dang te chu kan tik dial dial a nih kha. Kum 2024 inthlanpui alo awm a, MP 300 chuang neih tum kha 240 chauh neiin, midang mamawh lo thei lovin Pathianin a siam a, kan Pathian rorel dan hi a makin, a ropui a ni.

Hneh takin lo sawrkar pawh nise, India danpui Article 371G pawh nghing tura ngaih a nih laiin, midangten Dân an neih dan leh keini neih dan hi a inang lova, State dangin Special Proivision an neih hi chu khawngaihna a pek a ni a. Keini neih erawh hi chu engtikawng maha tihdanglam theih loh a ni. He remna neihna tur hian MNF in tih hmasak tur tam tak kan nei a, kha tih laia kan Dân hman mek pawh India Dân kalh lova siamrem a ngai a, kan ralthuam zawng zawng pawh surrender lovin, kan hand over a ni. Kan tihtur kan tih hnuah annin he Article 371G hi min hlan a ni. He Dân hi min chhuh dawn chuan aman kan pek tawh kha min pek let leh angai dawn a. An kuta kan hlan hi India hian min pek let tur a nei tam em em a, chumi min pek let erawh thil tih chi a ni lo ang.

Kan remna ngheh leh lawmawm zia hre chunga, a man kan pek tawh min pelet leh dawn a nih chuan Supreme Court-ah ah kan zualko nghal a ngai ang. Supreme Court emaw International Court of Justice in ngaihtuah se, thiam min chantir ngei ang. Chutiang thil chu Central sawrkar hi eng dinhmunah pawh ding se, an rawn tih a rem lo a ni. Heng hi hriain kan remna thatna leh nghehna te hi kan hriat chian lehzual a tul a ni Zoramthanga chuan a ti.

Inremna neih lai khan thlan lal nilo, Laldenga Sawrkar hnuaiah kan ralthuamte kan tung a, kan dote thuhneihna hnuaia kan chakna thahrui hlan kha rem kan ti lova, ram mipui aiawha zalenna sualtute himna tur ngaihtuah lawk rana he remna hi neih a ni, a ti bawk.

Remna Ni pual hian hnam pasaltha martarte hriatrengte nan leh sun nan ngawi rengin minute khat din a ni.

Rev. R. Lalrinsanga, Secretary, MKHC chuan hunserh hmangin Bible chang Rom 12:18, Galatia 1:3 chhiarchhuakin, Remna hlutzia hre turin a hun laia harsatna tawnglo tan thil har tak a ni a, a hre pha chuan Remna hlutzia hi sawi ban theih a ni lo, a ti a, kohhran hruaituten rammu te ko in, Laldenga ngei pawh ngenin, hun harsa leh khirh tak karah remna alo awm thei hi thil lawmawm tak a ni. Pathianin ram mipuite tawngtaina a ngaithla a, Rim taka inremna tura thawkte leh remna duh avanga inphahhniamte zarah inrem alo ni ta a. Kum 38 zet remna kan nei thei ta hi a hlutzia kan chhut nawn fo a tul a ni, a ti.

Rev. Rinsanga chuan, Khawvela pawl ropui UNO dinchhan pawh remna awmna tur a ni. Kan thenawm mai leh khawvel ram tina buaina thleng mek hian remna hlutzia min hmuh tir se, Lal Isua in 'inchungah thlamuanna awm rawh se', a tih angin thlamuanna awm zelna turin remna neih reng atul a, mahni chauhin remna a awm thei lo a, bawhchhiatna avanga van leh lei inrem thei tawhlo pawh Lal Isua avanga remna lo awm anih angin, a tlan ten remna kan neih zel hi thil pawimawh tak a ni, hawh u, remna hi i vawng nung zel ang u, tiin, ram mipui zawng zawngte a sawm a ni. 

Remna Ni puala hun hman hi  Tawnluia, Member, NCC chuan a kaihruaiin,  Lalchhandama Ralte, Vice President, MNF in Pathian hnena lawmthu sawina leh a kaihhruai zelna dila tawngtaiin hun a khar a. Vawiin hun hi MNF chuan Dist Headquarters, Block leh Unit thenkhat ah an hmang bawk a, Kolasib ah chuan Dr. R. Lalthangliana, MNF Sr. Vice President hovin Remna NI pual hian hun hman a ni.